( وصية أب لإبنه ) للشاعر الدكتور علي مسلم عجمي
الله يرضى عليك يا قلبي الوحيد
إياك ع باب اللئيم تمد إيد
خليك يا إبني شهم حر و عنيد
تمسك بحقك ابد عنو ما تحيد
تمسك بحكمة و عقل و الفكر الرشيد
و عاشر كبير الرأي منو بستفيد
و خليك ماسك مبدأك طول الحياة
و لا تعيش حاني الراس مذلول و شريد
لو دق بابك يوم شي عابر سبيل
خاصة لو لاحظت جسمو نحيل
إياك تكسر خاطرو. تردو ذليل
و شيطان نفسك يخدعك عنو تميل
و إياك إنك تجعلو عنك وكيل
و يستعبدك و تقول عنو لا بديل
و عاشر كريم النفس و بطبعو كريم
و ابتعد كل البعد عن ظالم بخيل
يا ابني القوة بالعقل مش بالجسد
و لا يحز فيك الصوت لو زأرة أسد
و خللي القناعة راس مالك. و الحسد
لا تقربو و عينيك لا تكون لو رصد
و لا تعاشر الفاسد بأعمالو فسد
مجتمع كامل إقتصادو لو قصد
بيخرب دعائم إقتصادو للوطن
و مال الفقير بينتهي و كل شي رصد
و إعرف يا إبني كيف تختار الصديق
و بحكمتك تختار رفقات الطريق
و إجعل اللي بينصحك أخ و رفيق
و صاحبو بيحميك لو توقع بضيق
و خللي لسانك بالحكي واعي و دقيق
لسانك حصانك إلجمو ان بلّش نهيق
و لا تستخف بحدا من بين البشر
قشة بنص البحر عم تنقذ غريق
و إصبر لأنو الصبر مفتاح الفرج
ابتعد عن أحمق إذا طبعو خرج
و لا يكون للخل الوفي عندك حرج
و إمشي بتأني فوق عتبات الدرج
و لا تنظر بشهوة و غريزة لو كرج
شيطان عينك و ابتدا فيها الهرج
خليك عنوان الشهامة و الأصول
و الشرف.. فارس مهرتو بنخوة سَرَج
الشاعر د. علي مسلم عجمي
لبنان
المعهد الأكاديمي الثقافي الدولي للسلام 
أضف تعليق