زجل قصيد باللهجة العامية اللبنانية
طرحة فلسطين
يا عرب فلسطين لا تتركوها
ومن ثوب العروبي لا تجردوها
افتحوا إلها بواب القلوب
طرحة فرح العرايس لبسوها
هونيك في شعب منكوب
وأطفال حطب للنار عملوها
وشيخ حق العيش مسلوب
قبال عينو أرضو عم يحرقوها
وجزار فاتح مسلخو عالدروب
وأعراض أشرف بشر يهتكوها
بستان وردها مقصف ومنهوب
بدل ما يقطفوها للروح يعصروها
فتك بكمامها بارود الحروب
حتى أهلها ما عادوا يعرفوها
وين حكام بلادنا والشعوب
وين الشهامي البطفولي رضعوها
وين الشرف الكان لِنا منسوب
كرامة الكرسي الضماير باعوها
وين السيف الكان للحق منصوب
وين قلوب رجال الشجاعه طووها
يا مجرم الحرب غالب ومغلوب
مهما جيوشك الغرب يدعموها
اشتروك حتى بأرضنا تجوب
وبيرجعوا يبيعوك كفوف العلفوها
أبن الأرض لبس الأرض روب
بلون دموا الطرحه لونوها
وزرع فيها الروح حبوب
مواسم تدفق بأرض خصبي
بتسعين ألف شهيد اشتروها
بقلم الأديب والشاعر يوشع علي إسماعيل..لبنان